1Sa 3 | NdeIBE | STEP | Umfana uSamuyeli wakhonza phambi kukaJehova engaphansi kuka-Eli. Ngalezonsuku ilizwi likaJehova lalingandanga; kwakungelamibono eminengi.

1 Samuel 3

UJehova ubiza uSamuyeli

1 Umfana uSamuyeli wakhonza phambi kukaJehova engaphansi kuka-Eli. Ngalezonsuku ilizwi likaJehova lalingandanga; kwakungelamibono eminengi.

2 Ngobunye ubusuku u-Eli, omehlo akhe ayesefiphala esebona kalufifi, wayelele endaweni yakhe yansuku zonke. 3 Isibane sikaNkulunkulu sasingakacitshi, njalo uSamuyeli wayelele phansi ethempelini likaJehova, lapho okwakulebhokisi lesivumelwano sikaNkulunkulu khona.

4 UJehova wasembiza uSamuyeli. USamuyeli wasabela wathi, “Ngilapha.” 5 Wagijimela ku-Eli wathi, “Ngilapha; ungibizile.” Kodwa u-Eli wathi, “Angikubizanga; buyela uyelala.” Ngakho wabuyela wayalala.

6 UJehova wambiza futhi wathi, “Samuyeli!” USamuyeli wavuka waya ku-Eli wathi, “Ngilapha; ungibizile.” U-Eli wathi, “Ndodana yami, angikubizanga; buyela uyelala.”

7 Ngalesosikhathi uSamuyeli wayengakamazi uJehova: Ilizwi likaJehova lalingakavezwa kuye.

8 UJehova wambiza uSamuyeli okwesithathu, njalo uSamuyeli wavuka waya ku-Eli wathi, “Ngilapha; ungibizile.” Lapho-ke u-Eli wabona ukuthi nguJehova owayebiza umfana.

9 Ngakho u-Eli watshela uSamuyeli wathi, “Hamba uyelala, njalo nxa ekubiza wena uthi, ‘Khuluma Jehova, ngoba inceku yakho ilalele.’ ” Ngakho uSamuyeli wahamba wayalala endaweni yakhe.

10 UJehova weza wema khonapho, ebiza njengakuqala esithi, “Samuyeli! Samuyeli!” USamuyeli wathi, “Khuluma, ngoba inceku yakho ilalele.”

11 UJehova wasesithi kuSamuyeli, “Khangela, sekuseduze ukuba ko-Israyeli ngenze into ezakwenza izindlebe zomuntu wonke okuzwayo lokho zincencethe. 12 Ngalesosikhathi ku-Eli ngizakwenza konke engakukhuluma ngimelane lendlu yakhe – kusukela ekuqaleni kusiya ekucineni. 13 Ngoba ngamtshela ukuthi ngizakwahlulela indlu yakhe okulaphakade ngenxa yesono ayesazi; amadodana akhe azidumaza, yena wehluleka ukuwakhuza.

14 Ngakho, ngayifungela indlu ka-Eli ngathi, ‘Icala lendlu ka-Eli kaliyikuhlawulwa ngomhlatshelo loba ngomnikelo.’ ”

15 USamuyeli walala phansi kwaze kwaba sekuseni wasevula iminyango yendlu kaJehova. Wayesesaba ukutshela u-Eli umbono, 16 kodwa u-Eli wambiza wathi, “Samuyeli, ndodana yami.” USamuyeli wasabela wathi, “Ngilapha.”

17 U-Eli wabuza wathi, “Kuyini akutshiloyo kuwe na? Ungangifihleli. Sengathi uNkulunkulu angakujezisa, kube buhlungu kakhulu, uma uzangifihlela loba kuyini akutshele khona.”

18 Ngakho uSamuyeli wamtshela konke, engamfihlelanga lutho. U-Eli wasesithi, “UnguJehova; kenze lokho akubona kukuhle emehlweni akhe.”

19 UJehova wayeloSamuyeli ekukhuleni kwakhe, njalo kayekelanga lalinye lamazwi akhe liwela phansi.

20 Njalo u-Israyeli wonke kusukela eDani kusiya eBherisheba wakwazi ukuthi uSamuyeli wayebekwe ukuba ngumphrofethi kaJehova.

21 UJehova waqhubeka ebonakala eShilo, njalo khonapho waziveza kuSamuyeli ngelizwi lakhe.